لمحّتا من الشبّاك ...
تفرّط من عيونا الخرز
تطرّز مخدّتها
مْسكت قميص من الزهرمشغول
غيّر لَ حالتها
ما حَكت بسّْ
فهمت
إنّو بْقميص الْ مسكتو
ريحةْ عطر نزّلت دمعتها .
متل الْ كأنا هالدني كابوس بقمقم سْحر والليل آسرها،
ومتل الْ كأنو النور طفل زغير
جوى مَغارة ...
انفكّت قناطرها.
ومتل الْ كأنو بنت بْحكاية
بشعراتها تخبّى النجم ..
قصّوا ضفايرها .
ليش الحزن فرّق علينا تْياب ....
نحنا فساتين القصب
للفرح خيّطنا
نحنا الْ حْكنا من الشعر زنار
وحب الخرز عالصدر شكشكنا
والتنتنا....
حب العنب، والشال ....
سكبة دهب عابيادر الحنطة .
ليش الحزن طوّل علينا الليل،
ونحنا خْمور من العنب للصبح عتّقنا.