انا كنت مسافر..مره
لجماعه اصحابى..ف غمره
قابلتنى..عيون سحرتنى..
وخادتنى..ف لحظه لشبرا
انا كنت مسافر مره....
*****
العقل سافر منى..
والنوم ..م العين ..والننى
مشغول ..والشوق مشاغلنى
ودانى ..العتبه الخضره!
انا كنت مسافر مره......
*****
سألت الجاى..والرايح
عن بدر..شوفته امبارح
سبحان ..من خط ملامح
وعيون..نعسانه..وقادره
انا كنت مسافر مره........
*****
الخد ربيع..أزهار..
والشعر جدايل..ليل
الوجه صبح ..نهار
الكل اليه..بيميل
بالشوق والوحده..المره
انا كنت مسافر مره..........
*****
نستنى كل اصحابى
والسكه تاهت..بيا
ومليت الكاس ..بعذابى
من نظرة ..عينك ليا
خلتنى من العشاق..
ف لحظة..لقا وفراق!
سبحانه..صاحب القدره
انا كنت مسافر مره..........
*****
دورت..ف كل حاره
على نسمه ..تطفى نارى
ولاحتى اى ..أماره
تريحنى من ..مشوارى
ورجعت بجرحى..وعذابى
ولا شوفت ..حتى أصحابى!
******
ابراهيم القاضى.....1999