شيء ما بيا منسيتش كيف عنقهم و قتلك ما تفرقنا كان الموت اما انت نسيت
شيء ما بيا ما نسيته غناية بوشناق كي قال نحبك نحبك و نحب نحبك هو يفوت في الغناية و تكمل وانا نبقى نعاودلك فالأربعة كلمات هاكم لين نتعب اما انت كاينك نسيت
شي ما بيا غير النار شاعلة فيا...
شي ما بيا انا نقوم و الدنيا تجبدني من ساقي تكركر فيا...
شي ما بيا غير نحس بوجيعة في قلبي كل يوم تزيد شوية...
شي ما بيا غير إلي حبيته خلاها بيا في شطر الثنية..الثنية إلي تهديت وانا نفرش فيها بيديا ورد بعد ما كانت شوك...
شي ما بيا غير نحس بغمة نعرش كي الغصة واقفة في حلقي محبتش تخرج...
شي ما بيا اما خيالك لتو خالط عليا وين ندور نلقاك تتبسملي و تغمزلي نتقابلو في آخر الثنية...
شي ما بيا أما الأمور موش هي و النغمة متوصلش لحتى بلاصة...
شي ما بيا مانيش نبكي و دموعي ماهيش هاينة عليا أما دخلت نموسة في عينيا ...
ما بيا شيء وحتى كان بيا هاني كاتمة دايا في ردايا وعاطية للذل كارو....
معادش تسألوني شي ما بيا هاني عايشة في وسطكم كي الغريب لين ربي يحن عليا...
*********************
بقلم هاجر وشتاتي ....