ردات حورانية
هي :
يا شويقي لا تيجينا درب الهوى مَرصُودة
وان كان العشق غلّاب واجّند بالبارودة
هو:
يابنية وحق العيون لَغزي ديارج واجيلج
واهلج وان كانوا السباع اني فعالي تحجيلج
هي:
قالولي مارق من هون قلبي طار وهدّيتو
وبالوطى فوق التراب لاجل الخُطى مديتو
هو:
لقعد على بابِكم واقطع درب المرّارة
واعطيج عيوني الثنتين ولا اشوفج محتارة
هي:
يا بعد اِهلي والعيون والعمر ماعزّيتو
قالولي العقل مجنون يومن الك وديتو
هو:
يابنت كفّي الحكي والقِدِر لاتْحُكينو
عقلي طاير من راسي خلّي القلب ع دينو
مها