خاطر أنا ماكتبتش عليك - بقلم لمياء بن قبلي

Admin عدد المساهمات : 2717 تاريخ التسجيل : 26/02/2009

*خاطر أنا ماكتبتش عليك؟؟؟*

قلي شبيك !!
نحسك متوتر معايا
نحسك كل مرة تجرحني
كل مرة تجبد يديك
زعمة انت خايف أكثر مني؟؟
تي أنا نشوف في روحي نرعش في عينيك
تتذكر... كيف حليت عينيا ولقيتك قدامي
تتذكر كيف قتلك راني مهبولة
انت بحذايا وأنا نحلم بيك
تتذكر كيف نحط يدي في يدك
ونقلك رد بالك تسيبني
مني انا ما تسمعش كلمة توجع
انت توجعني وأنا نرضيك
تتذكر كيف تقلي أغزرلي وين شاردة؟؟
نقلك خليني راك بحذايا ومتوحشتك
كان نغزرلك نذوب فيك
قلي شبيك!!
ماكش مرتاح معايا
والا تشوف فيا نزوة مرّت بيك؟؟
كيفاش نثبتلك عشقي؟
كيفاش نقلك راك انت حياتي
مايهمنيش اش قالوا عليك
مايهمنيش ماضيك
أنا حبيتك كيفما أنتِ
تحب نقول إسمك؟؟ ؟
تحب نتحدى العالم؟؟
تي أنا برموش عيوني نحميك
وإلا خاطر ماذكرتش في قصايدي
تربيجة وإلا سر خاص بيا وبيك
قلي شبيك ؟؟
أقربلي نقلك حاجة في وذنك
مع انك حتى بعيد تسمعني
أصلا أنا نتفس بيك
قلي.. خاطر أنا ماكتبتش عليك ؟؟
اغزر في عينيا مش نبوحلك
بأسرار بين ضلوعي مخُبية
ريت حروفي... ريت المعاني
ريت الفتحة والضمة والسكون
إسئلهم أنا نكتب لشكون
تعرف... ديما نسئل في روحي
لشكون نكتب أنا؟؟؟
ملي عرفتك فهمت إلى أنا نكتبلك من صغري
إلى أنت سبب كل دمعة على خدي تجري
مش تغششني لالا
دموع الفرحة والدفاء إلى زرعته فيا
ودمك إلى حسيته في دمي يسري
احضني وماتبعدش عليا
راك انت جيتني من ربي هدية
تستخايل مانكتبش عليك
تي أنت وليت كل أقلامـي وألواني
نخاف نهار نبوح على غفلة بمعانيك
نخاف يقراوك في سطوري
والا يشوفوك فرحة في عيوني
نخاف نهار نحل عينيا ما نلقاكش
و نستخايل كالعادة اني نحلم بيك
نمد يدي... نتصدم ماكش بحذايا
والحقيقة هي.....
نجحوا وبعدوني عليك
خليني مذنبة في عشقك
حتى تظهر براءتي
العالم الكل والله ماينسيني فيك...

#لمياء_بن_قبلي

» إبك يـا ڨلبـــي ** لمياء بن قبلي
» تكلّم وكفكف بمنديل صبرِِ # لمياء بن قبلي
» ((في عيونك)) - بقلم لمياء فلاحة