شفت ياخويا الست سعاد
عماله تهري
ويا جوزها عم فؤاد
ها وبعدين ؟
عاملالي فيها انها نغه
عايزه ياخويا يجبلها ورده
إمّا تخلي حياته هباب
قالها حاضر بس شويه
لما اتلم علي القبضيه
هو تملي فيا معانده
انا مملكش في جيبي جنيه
شوفتي ياختي عمايل الراجل
قال مستخسر فيا هديه
في عيد الحب
اللي تملّي يقولوا عليه
طب دبدوب
طب ارنوب
طب سحليه
قوليلي ياختي أعمل فيه إيه
انا قولتلها اسم الله عليكي
ياختي استحملي بس شويه
ما أنا أدامك
ياما طلبت يجيب عربيه
أمشي بيها في يوم واتغندر
أدام نسمه وجارتي سنيه
وعامل فيها ياختي عبيط
ها وبعدين؟
بس ياسيدي وقمت انا خارجه
سايبها يابني نار علي زيت
قولي ياخويا
هو عيد الحب دا إيه
قالها عيد الحب ياستي
واحد فاضي
قال ياحببتي
جه يتمنظر
قام متعكّـر
وكل الدنيا داعيه عليه
كان بيفكر إنه إن نعّر
يصبح روميو معاه جوليت
لكن حظه كان ليل أغبر
لقى في الخيه جت رجليه
ايوه ياخويا ها وبعدين؟
بس ياستي
إنت شاغله دماغك ليه
قومي ياختي حضري غدوه
حتة فرخه ولا بانيه
ستات فاضيه
وعايزه القاضيه
جاتكم خيبه عايزين إيه
-------
هدى نور
مساءكم ابتسامه من القلب
الأحد مايو 12, 2024 2:15 pm من طرف bedoorsayed
Ahlamontada 
موضوع: شفت ياخويا الست سعاد - هدى نور